محمد عبدالرحمن
٦ ديسمبر ٢٠٢٥
ليه سوهاج بلد المواويل
سأت نفسك قبل كدا اشمعنا سوهاج بلد المواويل؟!
ليه مش الأقصر مثلا مع انها فيها مواويل وزغاليل والخير كله
طب دا ايه علاقته ب حوحة و ونينة واسطورة نواح ايزيس
انا هقولك بس قبل ما اقولك اقرى كدا المرثية دي
يا ولاد محارب ….حوحة …نصبولكم قارب…حوحة…والقارب طينة…حوحة….عدى ونينة….حوحة….ونينة تكاكي…حوحة…وتقول ياوراكي…حوحة…ياوراك الشوم…حوحة…عدى الفيوم …حوحة .
القصة ان طينة سوهاج من عصر الفراعنة وهي عارفة طقوس الموت والرثاء وهي بلد المواويل من أيام ايزيس اول نائحة في التاريخ واللي ندبت اوزوريس اللي بيقال ان جثمانه في مقبرة في العرابة المدفونة ومعبده اللي في ابيدوس .
وطبعا من هنا اصل تسمية كلمة موال ان ايزيس كانت بتندب وتولول على اوزوريس
الجزء المقدس دا من الأرض اللي كان بيحج فيها الموتى للحساب عند اوزوريس واللي كانو بيتمنوا يتدفنوا جنبه ويتباركو بيه خلى السوهاجيين يتوارثوا الندب والنواح والمحبة والإخلاص لاوزوريس على هيئة مواويل ومنه لقلوب المصريين كلهم .
من بعد السوهاجيين القدماء عملنا احنا بقى موال احمر ودا نوع مختص في مشاعر الحزن والمرض والعلل والتداوي ، ومش بس كدا احنا عندنا موال اخضر مختص بالحب والعشق وموال مربع ومخمس ومسبع واكتر متعدش
الفكرة بقى ان سوهاج شهدت زمان أنواع الأغاني والشعر المصري اللي كان فيه مد وتطويح مع نبرة الحزن بشيء من التصوف غير طبعا رحلة الحج لابيدوس وتشجيع ايزيس لابنها الصقر حورس انه يحارب ست
وهنا كان اول ند من اخميم شرق النيل وانشدت وقالت
أي حور ولداه ، انت على الشاطئ ، لا ينمو العوسج ، اغرس حربتك ستطير سهامك ، لتقتل اوزة وحشية
ومن هنا انطلق الناس في سوهاج في غناء شعبي قديم وهو في الأصل مرثية
يا ولاد محارب ….حوحة …نصبولكم قارب…حوحة…والقارب طينة…حوحة….عدى ونينة….حوحة….ونينة تكاكي…حوحة…وتقول ياوراكي…حوحة…ياوراك الشوم…حوحة…عدى الفيوم ….حوحة
لو انت من محبين الشيخ امام والفاجومي هتلاقي ان دا نسخة من بقرة حاحا اللي غنوها تعبيرا منهم عن حزنهم بإن مصر الغنية وكلها خير بيُنهب ومش بيوصل لولادها ودا ان دل بيدل على ان النوع دا من المواويل وأي حاجة ليها اصل مصري بتفضل في دم المصريين وقلوبهم لا ارادياً .
المقصود هنا بطينة هو إقليم سوهاج القديم وونينة قرية تابعة لمركز سوهاج غرب النيل وعدى الفيوم المقصود بيها قناطر الفيوم مفتاح الإقليم الفرعوني اللي كان بيمر تحتها القارب الفرعوني اللي فيه جثمان المتوفي اما حوحة فهو حورس على مركبه المزخرفة اللي عدى بيها تحت قناطر الفيوم على النيل المقدس
ومن هنا بقى انطلق الشعبيين في الابداع
بداية من اليوم اللي ناحت فيه ايزيس عشان تلهم الاف الفنانين بعدها بالاف السنين
وبعد اكتر من خمستلاف سنة يطلع صوت داليدا بشهادة ترجع فن الموال لمنبعه فتغني من كلمات صلاح جاهين
نحب نتعرف …ورانا ايه
نحب نتشرف …ورانا ايه
ومنين يابلدينا وبلدكوا ايه
احسن ناس …سوهاج بلد المواويل
سوهاج …برج الزغاليل
سوهاج ياحبيبي ياحبيبي دي عروسة النيل
