محمد عبدالرحمن
٦ ديسمبر ٢٠٢٥
إلهام شاهين عاشت قصة حب مع رجل الأعمال رامي لكح. و”رامي” مسيحي كاثوليكي ومتجوز..
ومن حبه فيها حط طيارته الخاصة تحت أمرها.. وفي مرة كانت مشغولة بتصوير مسلسل “مسألة مبدأ” وجالها اتصال منه وقالها: “نفسي أشوفك ونتعشى سوا”.
وساعتها كان موجود في باريس.
لكن إلهام قالتله: “عندي تصوير الصبح مش هلحق آجي وأرجع”.
و”رامي” قالها: خدي الطيارة وتعالي وأنا هخليكي ترجعي القاهرة قبل ميعاد التصوير.
وعشان إلحاحه وصلوا لحل وسط.. واتفقوا يتقابلوا في النص بين القاهرة وباريس..
وبالفعل اتعشوا سوا في بيروت. وتاني يوم الصبح كانت في التصوير.
ومكنش غريب يبقوا عايزين يتجوزوا بسرعة. والمشكلة الوحيدة كانت في اختلاف الدين.
وإلهام رفضت تغير ديانتها.
وهنا “رامي” قرر يدخل الإسلام.
بس أهله قلبوا الدنيا عليه.
وإلهام من خوفها عليه بعدت عنه ونهت علاقتهم. عشان لو نفذ اللي في دماغه أهله ممكن ينتقموا منه لدرجة إنهم يموتوه.
وانتهت العلاقة وكل واحد راح لحاله.
لكن الأزمة الكبيرة حصلت لما “إلهام” اتكلمت عن قصة حبهم في برنامج مع المخرجة إيناس الدغيدي..
وقالت: “كانت قصة حب لطيفة بس مكملتش.. رامي إنسان جميل وراجل بمعنى الكلمة وأكتر شخص لطيف ومتسامح قابلته في حياتي”.
والدنيا اتقلبت في بيت رامي لكح.. والشكوك اللي جوا مراته من علاقته بإلهام شاهين اتأكدت
فـ طلع وقال:
معرفهاش ولا شفتها من 10 سنين.. وكل لقاءاتي معاها كانت في مناسبات اجتماعية
أنا إنسان مسيحي كاثوليكي، ومفيش عندنا طلاق.. ومراتي ست جميلة وأنا بعتز وبفخر بيها وبحبها جدا
وعشان يشيل عن نفسه أي شبهة نزل شتيمة في “إلهام” وقال إنها بتدور على شهرة بعد ما راح زمانها
وكمان خلى المستشار القانوني بتاعه يعمل فيها بلاغ.
أما الفنانة نبيلة عبيد فـ اتخطبت لرجل الأعمال المسيحي اللبناني سركيس شلهوب.
والحكاية حصلت في السبعينات.. وقصة حبهم كانت حديث الصحف والمجلات الفنية في القاهرة وبيروت خصوصا إن كان فيها “مٌحن” كتير.
يعني مثلا ف مرة “نبيلة” تعبت وعملت عملية من غير ما تقول لـ “سركيس”.. ولما اتصل بيها على تليفون البيت محدش رد..
وفضل يرن لحد ما الشغالة قالتله: “الهانم في المستشفى بتعمل عملية ومفاقتش من البنج”
و”سركيس” خد أول طيارة وجه ع القاهرة.
و”بلبلة” أول ما فاقت مسكت التليفون عشان تكلمه.. لكن بـ تبص لقته جنب السرير بتاعها.
ولما عاتبها قالتله: “مرضتش أقلقك ولا أعطلك عن شغلك”.
ووقتها اداها عربية أحدث موديل هدية الشفاء من العملية..
وكان معروف إن الويك إيند يا إما في بيروت عنده.. أو ييجلها القاهرة.. ورغم كدا العلاقة مكملتش.. وسركيس شلهوب اتجوز بعدها.
والمذيعة المشهورة وفاء الكيلاني وقعت في حب الإعلامي اللبناني طوني ميخائيل بعد ما اتعرفت عليه في إيطاليا.
والعلاقة اطورت لما اشتغلوا سوا في راديو وتليفزيون العرب الـART. وقرروا يتجوزوا.
وطبعا كان صعب لاختلاف الديانة.. فـ راحوا واتجوزوا مدني في قبرص.
وبعدها عاشوا حياة سعيدة وخلفوا “جودي” و”ريان”.
وأسرة وفاء الكيلاني مكنش عاجبها الجوازة.. وفضلوا مقاطعينها لحد ما “طوني” دخل الإسلام.. وجم القاهرة عقدوا القران على إيد شيخ مسلم.. وبعدين عملوا فرح في لبنان.
والجواز استمر 10 سنين واطلقوا في 2016.. ويدوب سنة و”وفاء” اتجوزت الفنان تيم حسن
والمغنية السورية فرح يوسف – اللي اتشهرت بعد برنامج “آراب آيدول – جوزها شاب مسيحي من فنزويلا واسمه “كريستيان”.
و”فرح” و”كريستيان” عاشوا قصة حب استمرت 3 سنين.. ولما اتفقوا على الجواز قالها إنه مستعد يغير دينه ويدخل الإسلام
و”فرح” رفضت وقالتله: “مش عدل إن إنسان يغير دينه عشان يعرف يتجوز”.
واتجوزوا جواز مدني في أمريكا.. ولما الناس انتقدوها قالت: أنا مسلمة وجوزي مسيحي.. وكل واحد فينا بيكمل التاني.. وإحنا الاتنين بنعبد الله الواحد.
وبالنسبة لولادهم فـ هتربيهم على تعاليم الإسلام والمسيحية
وكمان الست سلوى خطاب حبت المخرج المسيحي أسامة فوزي بعد ما عملوا مع بعض فيلم “عفاريت الأسفلت”.
و”أسامة” غير دينه ودخل الإسلام علشانها واتجوزوا.
والاتنين انفصلوا بعد فترة. رغم حبهم الكبير. لدرجة إن سلوى مرتبطتش بعده.
ومن أشهر الفنانات اللي معندهمش مانع يتجوزوا راجل من غير دينهم “هيدي كرم”.
وإنتم: يا ترى إيه رأيكم في اللي عملوه؟
