محمد عبدالرحمن
٢٢ ديسمبر٢٠٢٥
سمية الألفي حياتها كانت مليانه أحداث صعب عقل يصدقها
سمية كانت شرقاوية أمها من أبو كبير وأبوها من الزقازيق واتجوز امها وكان أكبر منها بحوالي 20 ووافقت عليه لأنه كان بيه ليه قيمته ووضعه
أبو سمية اتجوز امها في المنيل وقضوا حياتهم كلها في القاهرة وخلف منها حوالي ٤ عيال من ضمنهم نجمتنا الراحلة سمية
أبوها كان مصرف بطريقة محدش يتوقعها لدرجة أن مراته كانت بتتخانق معاه وتقوله لم إيدك شوية يقولها لا خلي العيال تعيش وتنبسط
سمية وقعت في حب التمثيل من وهي في الاعدادي وشاركت في المسرح بس مكنتش تقدر تقول لأهلها الكلام دا لأنها بتخاف منهم وعارفة موقفهم من التمثيل
وفي يوم صحيت سمية الفجر على عياط وصويت في البيت لاقيت أبوها مـ ات.. قامت خدت الكتب بتاعتها ولبسها واختها الصغيرة وطلعت على بيت صحبتها وقعدت عندها عشان تعرف تذاكر وتحقق حلم أبوها وتدخل جامعة القاهرة
وفعلا قدرت تحقق الحلم وجابت في الثانوية العامة ٦٨ ودخلت كلية آداب قسم علم اجتماع لأنها كانت عايزة تبقى اخصائية اجتماعية في المدرسة بسبب حبها للأطفال
ورغم كده اول ما دخلت الكلية سألت على مسرح الجامعة واشتركت فيه وقدمت مسرحيات كتير لحد ما اكتشفها واحد وقدمها لمسرح الطفل وهناك اتعرفت على ابو ولادها فاروق الفيشاوي واللي كان وقتها لسه طالب في معهد فنون مسرحية
سمية فضلت تقدم مسرحية وراء مسرحية لحد ما شاركت مع الفنان محمد صبحي واللي قالها أنها هتبقى نجمة كبيرة في المستقبل
سمية وقعت في الوقت دا في حب فاروق الفيشاوي وهو كمان حبها واتجوزته غصب عن أهلها اللي كانوا رافضينه عشان ممثل وماشي مع الجماعة الشيو.عيين
ورغم الحب دا كله جوازهم مستمرش كتير بسبب خيا.نته ليها وانفصلوا وبعده اتجوزت الملحن مودي الإمام وبرضو انفصلوا بعد فترة
سمية كان لسه قلبها برضو بيدق وعايزة تكمل حياتها مع راجل كويس ف اتجوزت المخرج جمال عبد الحميد وللأسف حصل معاهم نفس اللي حصل في الجوازة اللي قبله وانفصلوا
المفاجأة كانت في العريس الرابع وهو المطرب مدحت صالح ودي كانت أقصر جوازة في حياة سمية الألفي وانفصلوا وقتها بسبب مشاكل كتير حصلت بينهم.. وبعدها رجعت لجوزها وحبيبها الأول فاروق الفيشاوي
سمية مـ ات لها 12 ولد قبل ما تجيب ابنها الكبير أحمد الفيشاوي ودا لأنها كانت لما بتتعصب وتزعل بتكتم جواها ف دا كان بيخلي الجنين في بطنها يمـ وت
ومع ذلك استحملت لحد ما جابت أول فرحتها أحمد لأنها كانت بتحب الاطفال زي ما قولتلكم فوق.. ومن بعده جابت عمر وقالت كفاية مبقتش قادرة
سمية رفضت تتحجب وقالت مش حتة ايشارب أو طرحه هي اللي هدخلني الجنة المهم علاقتي بربنا إيه.. وبعدين الحجاب اختلفوا عليه المشايخ فيه اللي قال فرض وفيه اللي قال مش فرض
سمية الألفي اعتزلت التمثيل وقالت الحمدلله أنا بقى عندي رضا كبير واكتفاء ومش عايزة تمثيل ولا أضواء وفعلا كان آخر عمل ليها سنة ٢٠١٠
سمية عانت ٦ سنين من نوع سـ رطان نادر كان في الثدي والغدد الليمفاوية وأكياس في الرحم والحوض والعمود الفقري وسافرت سويسرا تتعالج هناك وعملت حوالي ٧ عمليات في ألمانيا وسويسرا وامريكا لحد ما رحلت النهارده عن عالمنا
