محمد عبدالرحمن
٢١ ديسمبر ٢٠٢٥
خليني اقولك بالبلدي ليه فيلم الست فشل، ونجح في إنه يكون أكثر فيلم سبب إستياء عند الجمهور المصري يمكن في آخر عشرين ثلاثين سنة.
انا مش هقولك أم كلثوم تعتبر إيه بالنسبة للمصريين، وانها رمز ومينفعش تشويهه، وعيب نطلعها بالشكل ده، وكل الكلام اللي اتقال ولسه بيتقال ع السوشيال ميديا.
لكن هقولك إن الجمهور المصري مينفعش تعانده، وتعرض له فيلم وتقوله اتفرج وانت ساكت من غير ما تقول رأيك، ويطلع كاتب الفيلم يقول انا فاهم أنا بعمل ايه، ولو كان فيلم عن رسول كان هيبقى أسهل، ويطلع شوية فنانين الجمهور بيفهم أحسن منهم ألف مرة، يكلموا الناس بكل تعالي ويقولوا الفيلم جميل واللي بيهاجموه مبيفهموش وعندهم غل وحقد.. الكلام ده كله عمل فجوة كبيرة بين الجمهور وبين الفيلم اللي عاوز يطلع الناس كلها مبتفهمش..
مينفعش تفرض على الجمهور المصري بالذات رؤيتك ووجهة نظرك بالعافية، وتعمل دعاية وتتدفع لشوية إعلاميين ومؤثرين علشان يطبلوا فالجمهور يقبل الفيلم بالعافية، ومتخيل ان الجمهور ده اهبل أو ساذج ومش فاهم الفيلم بيتسوق له إزاي..
الناس كان ممكن تقبل الفيلم رغم كل عيوبة، لو مكنتش حسستهم ان هما مبيفهموش، وانت بس اللي صح وانت بس اللي بتفهم، والناس أغبياء وعندهم غل وحقد والكلام الفاضي ده..
كاتب الفيلم لما يطلع في أكثر من لقاء يقول انا قاصد أطلع أم كلثوم بالشكل ده، وفيها ايه لما نطلعها ست حرشة!! وكأنه بيتكلم على طبق مخلل، مش أسطورة محفورة في كل بيت مصري، ده إسمه عنجهية وكلام فارغ، لازم الجمهور ينفر بسببة من الفيلم..
اهو إيرادات الفيلم محصلتش عشرين في المية من تكلفته، وانت اللي عمال تخسر لأنك عملت الجمهور اللي انت محتاجة خصم، وكمان خصم مبيفهمش وعنده غل وحقد..
مفيش إعلامي ولا مؤثر ولا فنان من اللي انت وصيتهم يتكلموا كويس عن الفيلم هينفعوك ويعوضوا خسارتك المادية، لإن اللي انت كنت محتاجهم هما الجمهور، اللي هيطلع فلوس من جيبه وهو حاسس إنه ملك زمانه ويروح يتفرج على الفيلم، وهو برنس مش وهو بيقولوا عليه حاقد ومبيفهمش..
في النهاية هقولك حاجة ممكن تبان دروشة، ام كلثوم لو ست وحشة مكنش ربنا هيخلي كل الناس دي تحبها، ولا كان سترها كل العمر ده، ولما تيجي انت تعمل فيلم يطلعها مش حلوة قدام الناس اللي ربنا حببهم فيها، يبقى في حاجة غلط.. تقول عليا شيخ بقى قديس ده مجرد رأي أو استنتاج..
ده حتى الراجل اللي كان راعي الفيلم وليس منتجه على حسب كلامه هو، طلع وقال إحنا ملناش علاقة بالفيلم، وكأنه جريمة بيتنصل منها، انت متخيل حجم المأساه قد ايه!!..
دي مش أول ولا آخر مرة يحصل فيها العند ده بين الجمهور وبين عمل فني، وفي كل مرة الجمهور هو اللي بيكسب، لان المنتج ده أو العمل ده كله على بعضه الجمهور هو اللي هيشتريه في الآخر أو يرفضه، وبمزاجه في الحالتين مش غصب عنه.
