محمد عبدالرحمن
٢٠ ديسمبر ٢٠٢٥
مع احترامي الشديد لمعالي رئيس الوزراء و السيد احمد المسلماني ما فيش حد فيكم يعرف مشاكل التلفزيون المصري على حقيقتها ولا انتم عاوزين تسمعوا الحقيقه ولا حتي تعرفوا الحلول ….
ياسيادن معالي رئيس الوزراء تعرف ايه معاليك عن مشاكل ماسبيرو
تعرف ان احنا شغالين بدوفر حمار مش برجله
تعرف ان احنا بنصرف من جيوبنا على شغلنا عشان بنعشق المكان وبنحبه
تعرف ان ما فيش استراحه محترمه ولا كرسي نضيف يقعد عليه أي ضيف
تعرف ان ما فيش كاميرا عدله ولا سليمه
تعرف ان جميع الاجهزه في استوديوهات الهواء بايظه ونفضل نقرا قران عشان ما توقفش مننا على الهوا
تعرف ان احنا بنجيب الضيوف للمبنى وبنروحهم باوبر على حسابنا وكمان بنضيفهم و مشاريبهم ونسخ الحلقه بفلوسنا
تعرف ان مفيش عربيه نطلع بيها اوردر خارجي ولو لقينا تبقي دبل كابينه واحنا الي بندفع تمن الغاز ونراضي السواق كمان
تعرف ان نص عربيات الهندسه الخارجيه بها الف مشكله فنيه
تعرف ان احنا كل مجهودنا بيتمسح اول باول ولم يعد لنا تاريخ لان ما عندناش شرايط نسجل عليها لاننا لا نملك شرائط خام وبنمسح الشغل كل شهر ونصف
تعرف ان ما فيش حمام نضيف نقدر ندخل فيه ضيف ولا حتي ندخله احنا
ميه مقطوعه وسباكه بايظه ونظافه منقوصه
تعرف ان القذاره في الطرق والسلالم والمكاتب والاستوديوهات والحمامات كأنك داخل خرابه مهجوره
الا طبعا مكاتب القيادات الفاخره النظيفه
تعرف ان شركه النضافه زي الزفت ولكنها شغاله لأنها بتمشي حالها
تعرف ان الممرات ضلمه وبنولع الموبايلات عشان الضيوف تعرف تمشي
لان اللمبه الي بتتحرق مابيجيش بدالها
تعرف ايه عن الرعايه الطبيه ومعاناه الموظفين والمعاشات عشان يصرفوا روشته ولا حد يعمل عمليه
وكل المستشفيات والصيدليات لغت تعاقدها مع التليفزيون
تعرف ان التكييفات بتشتغل ب قوه ٢٥%
فقط لأنها محتاجه صيانه ب 40 مليون
ومفيش فلوس نصلحها
ليه مااعرفش
تعرف معاناه المذيعين والمذيعات مع اللبس و ماتيريال المكياج مع مرتبات متدنيه
تعرف ان 3/4 اسانسيرات المبنى معطله وبننزل وبنطلع على رجلينا بليل وكلنا عدينا ال 50
تعرف ان ما فيش مكنه تصوير في المبنى كله بكل قطاعاته ومش بنعرف نصور اسكريبت ولا نطبع ورقه
تعرف مرتباتنا كام
ومن 2014 مازدناش جنيه
ومطلوب مننا نلبس ونتشيك ونتمكيج ونعمل شعرنا ونبقي هوانم عشان احنا واجهه لماسبيرو تليفزيون الوطن
تعرف ان كل المناصب والكراسي بتتاخد وتتوزع بالهوي والحب والمصالح على الحبايب وحبايب الحبايب والقرايب والجيران والصحاب واهل الثقه والمطبلاتيه وبس
تعرف ان الفنانين والمبدعين وأصحاب الفكر والرؤيه والدارسين مهمشين وملغيين ومضطهدين
وبيتاذوا كمان عقابا علي شطارتهم وشغلهم
وقولهم للحق
تعرف ان مفيش خط تليفون واحد ولا وصله نت في جميع استوديوهات برامج الهواء
تعرف ان وحدات المونتاج جابت آخرها خلاص ومفيش لا تصليح ولا شراء جديد
تعرف ان لا عدل ولا حق قائم في المبنى من عمر العمر
تعرف ان البطاريات واللمض وكل شيئ يخص شغلنا
احنا اللي بنشتريها عشان الشغل يطلع مشرف ولأننا بحب مكانا
تعرف ان بقى لنا اكثر من 14 سنه تقريبا ما بنصرفش سلف انتاجيه
لتيسير العمليه الانتاجيه
تعرف ان ما فيش ديكور ولا اضاءه ولا اكسسوار لبرنامج واحد اتغيرت من سنين ونص الكشافات محروقين
والكاميرات بايظه
تعرف ايه عن المبنى
و مشاكل المبنى
وولاد المبني الي طافحين الدم عشان يحافظوا علي ماتبقي من اسم وسمعه ماسبيرو
احلامنا ماتت وشغفنا انتحر وطموحاتنا اغتيلت اصبحنا جثث بلا روح من كتر مااتعمل فينا ….
اما المديونيات بالمليارات اللي معاليك بتتكلم عنها
لا سببها ضرائب ولا تأمينات ولا مديونيات الحكومه ولا اي حاجه ثانيه
ولا ولاد ماسبيرو سببها
ولا ماسبيرو نفسه له دور فيها
دي سببها تعين معاليك لقيادات فاسده فاشله ظالمه حراميه معندهش لا ضمير ولا اخلاق ولا دين ولا رؤيه ولا فكر و مرضي نفسيين و معدومي الخبره ..
سببها الشركه المتحده الي خدت خيرنا و دخلنا وولادنا وتاريخنا واشتغلت بيهم ووأدت ماسبيرو وبردو فشلت
معاليك عارف كل ده
بيوصلك وضعنا وماساتنا ولا لأ
معاليك الي جبت لنا القيادات وحطيتهم لنا بنفسك و باستشاره الي حواليك من اهل الثقه لا من اهل الخبره
ولم تحاسبهم على الكوارث اللي قاموا بيها طوال 12 سنه ظلوا في ماسبيرو يغتالوله ويفشلوه لصالح المتحده
ولحتى الان لم تحاسبهم على شيء
وخرجوا خروج امن ليه مانعرفش ؟؟!!!؟
لماذا لم يحاسبوا على ما فعلوه في التلفزيون المصري وفي اولاده وفي ميزانياته الي بالمليارات الي راحت
لازم يتحاسبوا علي الي عملوه في
تاريخ ماسبيرو
و في تراثه
و في شرايطه اللي سرقت ونهبت واتباعت لجهات خارجيه أمام كل الجهات ومحدش اتحرك
والي كان بيتكلم
كان بيتنفخ وبيتأذي
وكلمه حق اقولها
وقد احاسب عليها كالعاده ولكن اقولها لوجه الله تعالي
انتم للاسف سبب كل ما وصلناله في التلفزيون المصري
وسكوتنا على تلك الكوارث وقيامنا بعملنا علي اكمل وجه
لاننا لاحول لنا ولاقوه كاولاد ماسبيرو مخلصيين ووطنيين بنعشق تراب هذا البلد وبنخاف عليه من الهوى الطاير
عشان كده احنا مستمرين في هذا الوضع الكارثي مش عايزين نشمت عدو فينا
لكن معاليك واختياراتك واختيارات من حولك هي السبب في كل ما وصلناله
وكل يوم 1000
لجنه تشكل و تنبثق منها 100 لجنه تنعقد
عشان يعرفوا مشاكل ماسبيرو وهما بيشربوا فنجان الشاي مع قطع البيتيفور ومافيهمش حد من ولاد ماسبيرو واكثرهم هم سبب كارثه ماسبيرو سابقا
سبب انهيار ماسبيرو انتم وليس ولاده
وعليكم وحدكم الاصلاح
ان كانت النيه حاضره
فعيش بالمعروف
وان لم تكن
فتسريح باحسان
اعطونا حقوقنا وحلال عليكم المبني …
