الوزير فاروق حسني صاحب فكرة المتحف المصري الكبير

محمد عبدالرحمن

٣٠ أكتوبر ٢٠٢٥

نقلا عن ما قاله الوزير السابق فاروق حسني وزير الثقافة والآثار الخواجة الأيطالي هو السبب

سنة ٩٣ فاروق حسني وزير الثقافة والأثار كان مسافر باريس وكان معزوم على الغذاء بالصدفة في معهد العالم العربي ( وده مركز ثقافي في باريس للتعريف بالثقافة العربية ) .

وكان معزوم معاهم مهندس ايطالي وصاحب دار نشر كبيرة في ايطاليا وهما قاعدين بيتغدوا جت سيرة الأثار فسأله الإيطالي وقال له: “انتوا هتعملوا ايه في المخزن اللي عندكوا ده”

طبعًا هو يقصد المتحف المصري اللي في التحرير عشان مليان تماثيل كتير ومش معروضة بشكل كويس فقال عليه مخزن

الجملة دي استفزت فاروق حسني جدًا وبكل ثقة قال له:”احنا هنعمل أكبر متحف في العالم” هو قال الجملة دي كرد منه على اللي اتقاله من صاحبه الإيطالي لكن على أرض الواقع مفيش لا متحف كبير ولا أرض حتى ولا في تخطيط لمشروع حتي

.

المهم صاحبه الايطالي قال له خلاص أنا هجيلك مصر الأسبوع اللي جاي ولو الموضوع ده حقيقي هجيبلك تمويل من ايطاليا

رجع فاروق حسني مصر وأول حاجة عملها اتصل بالرئيس مبارك وقال له على فكرة المتحف ودار بينهم الحوار ده:

مبارك: هنجيب فلوس منين يا فاروق

فاروق حسني: المشروعات العملاقة هتلاقي التمويل يا ريس

مبارك : go ahead

بدأ فاروق حسني في التنفيذ واختار مكان المتحف قدام الأهرامات على طول وراح للسفير الإيطالي وقال له هنعملك دراسة جدوى هدية من عندنا لمصر واستمر الشغل على الدراسة لمدة ٤ سنين كاملة.

وفي نفس التوقيت فاروق حسني عمل مسابقة عالمية عشان التصميم المعماري للمتحف واتقدم ١٧٥٠ بيت عمارة من كل دول العالم لحد ما تم اختيار التصميم الحالي للمتحف اللي قدمه المصمم: هينجان بينج، وشريكته الأيرلندية روسين هينجن.

وفي سنة ٢٠٠٢ بدأ الحلم يظهر للنور وتم وضع حجر الأساس وكان متوقع يتم افتتاح المتحف في ٢٠١١ لكن الأحداث اللي حصلت وقتها وقفت المشروع تمامًا .

وبعد سنين من الشغل والمجهود الحلم بقي حقيقة وبقى عندنا أكبر متحف في العالم مش مخزن زي ما الخواجة الايطالي قال قبل كده.

المجهود اللي عمله فاروق حسني للمشروع ده كان مجهود كبير ويستحق التقدير لأننا مش بس قدام وزير ثقافة المشروع بدأ في عهده لكن احنا قدام فنان اهتم بالثقافة والآثار ونفذ مشروعات على أرض الواقع كان ليها أثر زي إنشاء مكتبة القاهرة الكبرى أو بناء قصور للثقافة في كل محافظات مصر ده غير إنه فنان عالمي بتتعرض لوحاته في أكبر معارض العالم زي متحف المتروبوليتان ومتحف هيوستن للفنون الجميلة عشان كده يعتبر رمز مهم للثقافة والفن في مصر.