رئيسة وزراء إيطاليا جورجيا ميلوني تعلن حضورها لافتتاح المتحف المصري الكبير
محمد عبدالرحمن
شكل الجو في مصر عجب جورجيا ميلوني رئيسة وزراء إيطاليا قوي اللي قررت بنفسها تحضر افتتاح المتحف المصري الكبير، واللي يعرف ميلوني كويس، عارف إنها مش من النوع اللي بيعمل مجاملات، يعني وجودها هنا مش صدفة ولا بروتوكول، دي جاية عن قناعة حقيقية إن مصر بقت في حتة تانية خالص.
الست شكلها انبهرت من أول زيارة، وشافت الجو والأمن والنظام والناس، وكل التفاصيل اللي بتخلي الزائر يحس إنه في بلد فيها روح وأمان وكرم، وده خلاها تروج لمصر بشكل مجاني من خلال زياراتها الأخيرة ونشرها عبر حساباتها على منصات التواصل الاجتماعي.
يعني تخيل رئيسة وزراء دولة أوروبية كبيرة بتتكلم بإعجاب عن جمال مصر، يعني دعاية سياحية ببلاش.
وكلها أيام قليلة ويتم افتتاح المتحف المصري الكبير اللي هيبقى أكبر متحف أثري في العالم، بيضم كنوز توت عنخ آمون وكل أسرار الحضارة الفرعونية، بس اللي بيحصل حوالين الحدث أكبر من مجرد افتتاح متحف، دي رسالة ثقة في مصر من قادة العالم نفسهم.
