العالم

الدكتور الصالحي يطالب بفتح باب تجديد الاجازات والقياس علي تجربة قطاع الكهرباء

كتب عوض العدوي

فجّر الدكتور محمد الصالحي، نائب الزقازيق ، أزمة جديدة تحت قبة البرلمان، بعدما تقدم بطلب إحاطة عاجل موجه إلى رئيس مجلس الوزراء، ووزير الإسكان والمرافق، ووزير التنمية المحلية، بشأن أزمة رفض تجديد إجازات العاملين بشركات مياه الشرب والصرف الصحي بالخارج وتهديدهم بالفصل من وظائفهم.

*وقال الصالحي في طلب الإحاطة:* “مئات الأسر المصرية دلوقتي مهددة، العامل قاعد في الغربة بيشتغل وبيبعت دولار لبلده، وفجأة يلاقي جواب بيقوله إجازتك اترفضت وارجع يا تتفصل.. هو ده جزاء اللي بيخدم بلده؟”

وأضاف النائب: “احنا قدام خيار ظالم، يا العامل يسيب شغله في الخارج ويرجع يقعد من غير شغل، يا يكمل في الغربة ويخسر وظيفته في وطنه اللي قضى فيها عمره كله.. فين العدل في كده؟”

*واستشهد الصالحي بتجربة قطاع الكهرباء*، وقال: “نفس الأزمة دي حصلت بالظبط مع عمال الكهرباء، وكانوا مهددين بالفصل، ولما صوتهم وصل واتكلموا عن حقهم، الدولة فتحت باب الإجازات وحلّت المشكلة.. طيب ليه عمال المياه لأ؟ اشمعنا دول يتحلّوا ودول يتدبحوا؟”

وأكد الصالحي أن المصريين في الخارج مش عبء على الدولة، بل هم رصيد اقتصادي حقيقي، وتحويلاتهم بالعملة الصعبة هي اللي بتدعم الاقتصاد الوطني وبتسند الجنيه في أصعب الأوقات، مطالباً بعدم معاقبتهم على غربتهم.

*وطالب النائب في ختام طلب الإحاطة بأربعة مطالب عاجلة:*
1. فتح باب تجديد الإجازات فوراً لعمال شركات المياه والصرف الصحي بالخارج.
2. وقف كل إجراءات الفصل المرتبطة برفض التجديد لحين إيجاد حل عادل.
3. تطبيق نفس ما تم تطبيقه مع عمال قطاع الكهرباء.
4. وضع آلية واضحة ومستقرة تحفظ حق العامل وحق الشركة في نفس الوقت.

واختتم الصالحي: “مش بنطلب استثناء غير قانوني، بنطلب حل منظم وعادل.. العامل ده مواطن مصري، من حقه يشتغل ويساعد أسرته، ومن حقه لما يرجع يلاقي وظيفته مستنياه”.

وطالب بإحالة طلب الإحاطة للمناقشة العاجلة بحضور الوزراء المعنيين.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى