محمد عبدالرحمن
٣٠ أكتوبر ٢٠٢٥
– في فترة الخمسينيات أسس رجل الأعمال أنسي ساويرس شركة orascom كشركة مقاولات صغيرة ومع الوقت بدأت تكبر وتبقى شركة عالمية مصرية وبقى ليها بصمة في مشاريع كتير .
– لحد ما الشركة دي بقت مجموعة شركات تحمل نفس الاسم مع اختلاف الأنشطة اللي دخلت فيها زي الإتصالات والسياحة والبناء وده بيرجع لاستثمارات أولاد أنسي ساويرس اللي فضلوا محتفظين باسم الشركة اللي أسسها والدهم
– لكن الاهم دلوقت مجال السياحة وتطوير منطقة الأهرامات اللي بقت منطقة منظمة ومريحة للمصريين والسياح عكس الأول بكتير.
– نبدأ بشركة orascom construction ودي شركة متخصصة في مجال البناء والبنية التحتية ودي تابعة لناصف ساويرس وهي اللي نفذت بناء المتحف المصري الكبير والتحالف تم بينها وبين الشركة البلجيكية besix سنة 2012 وكان المفروض المشروع يخلص بعد ٣ سنين لكن طبعاً ظروف البلد وقتها كانت سبب في التأخير.
– الشركة كمان ليها دور في إنشاء محطة مترو المتحف الكبير اللي نفذت أعمالها الإنشائية بسرعة كبيرة عشان المنطقة كلها تبقى جاهزة لأستقبال السياح.
– وعشان المتحف يبقى في احسن صورة كان لازم المنطقة اللي حواليه تليق به وده اللي عملته شركة “orascom”.
– نروح على للأهرامات ودي منطقة كانت مليان مشاكل شوية ومحتاجة تطوير لحد ما رجل الأعمال نجيب ساويرس يقرر يشتغل علي المنطقة دي..
– ومن خلال شركة orascom pyramids entertainment تعاقد مع المجلس الأعلى للآثار على تطوير المنطقة والمكان اتغير ١٨٠ درجة.
– وده كان واضح جدًا في عمل بوابات جديدة للدخول للأهرامات وعمل مواصلات صديقة للبئية جوة المنطقة الأثرية عشان يحافظ على الآثار ده غير تطوير مشروع الصوت والضوء اللي يعتبر من أهم فعاليات زيارة الأهرامات للمصريين أو للأجانب .
– نجاح شركات orascom في المشاريع اللي دخلوها كان دفعة لشركات مصرية توصل للنجاح وتبقى في نفس المكانة او على الأقل يبقى في محاولات للاعتماد على شركات مصرية في المستقبل.
