نبض العمال يهنئ ايمان كمال بأختيارها الأم المثالية

أحتفل الاتحاد المحلي لنقابات عمال بالجيزة برئاسة محمد كامل رئيس النقابه العامه للنقل العام ورئيس الاتحاد المحلى لنقابات عمال الجيزة

 

 

كرم 150 أم مصرية وأم الشهيد النقابات العام بمناسبة عيد الام وأهمية الدور المحورى لعظيمات مصر فى اعداد النشء وبناء قدراتهم للتصدى لحروب الجيل الرابع مجددا العهد للرئيس عبد الفتاح السيسى ببذل المزيد من الجهد والعمل لبناء مصر الحديثة وغرس بذور التنمية بالجمهورية الجديدة.

 

وبحضور كل من النائبة ولاء التمامى عضو مجلس النواب نائب رئيس الاتحاد المحلى لنقابات عمال الجيزة

و النائبة منيرة الاشقر عضو مجلس النواب أمينة المراة بالاتحاد المحلى لنقابات عمال القليوبية

 

 

وبحضور عبد المنعم الجمل نائب رئيس اتحاد عمال مصر والاستاذ سيد زغلول والاستاذ عبد الله وسط لفيف من القيادات والقادة العمالية

 

وتم الحفل في وسط أجواء مليئة بالحب والتقدير للدور الام وأهمية الدور المحوري لعظيمات مصر في إعداد لبناء مصر الحديثة وغرس بذور التنمية بالجمهورية الجديدة

 

تم تكريم السيدة ايمان كمال مؤسس فريق التحدي بالطالبية علي ماقدمتة للمجتمع بالاهتمام بذى الهمم وتعليمهم وعلاجهم واندماجهم في المجتمع عن طريق الفن والورش وتعليم الرسم وصناعة الفوانيس

 

ايمان كمال تحكي لنبض العمال
إعاقة أبنتي جعلتني ام 70 طفل من ذى الهمم
علاج الفن من انجح الاشياء مع اولادي

عالجت ذي الهمم بالفن والرسم والورش والكروشية وشغل الخرز وشغل الفوانيس رمضان

 

ايمان كمال مؤسس فريق التحدي بالطالبية تحكي لنبض العمال اليكم حكايتى

 

البداية

انا ايمان كمال ام لبنوته ذوى همم بنت وحيده على ولدينك ،كنت بحلم يكون ليا بنت تكون اختى وصاحبتى ننزل سوى تختار لى اللبس والوان الطرح زى مابشوف بنات اخواتى مع اولادهم وافرح بيها وهى عروسه وبأولادها زى اى ام.

بس ربنا له حكمه ان بنتى تكون معاقه وانا راضيه كل الرضا الحمد لله وبعتبرها منحه من الله وليست محنه
المهم معندناش اختلاط بجيران والاهل بعيد وبنتى كمان مش بتندمج مع بنات العيله لان هى حاسه انها اقل منهم لانها مش بتعرف تتكلم ولا تعبر وبتحب العزله .

معرفناش نكمل فى التعليم وصلت لحد الصف السادس الابتدائى ومكملتش
مش هتفرج عليها واسيبها عايشه كل حياتها تتفرج على التليفزيون فقط لان هى مش غاويه رياضه
انا كنت واخده دورات كتير جدا علشان اعرف اتعامل معاها ففكرت اللى انا درسته فى هذا المجال افيد بيه غيرى واساعدهم علشان لما اموت الاقى اللى يساند بنتى ويقف معاها.

الفكرة

روحت مركز شباب واتفقت مع المدير يخصص لى مكان وهعمل نشاط لذوى الهمم مجانا تمت الموافقه ودى كانت البدايه بتخصيص حجره صغيره بجوار الحمامات بعيد فى اخر النادى كان فى ولد كفيف ساكن امام النادى والدته بتشتغل وبينزل كل يوم من الصبح لاخر النهار فى النادى قاعد ومش بيعمل اى حاجة.

وكان فى ثلاث بنات اخوات( والدهم الله يرحمه اتوفى من حوالى سنه وهما لسه معايا من سنه ٢٠١٠ الكلام دا ومعظم الفريق معايا من وهما صغيرين انا مربياهم على ايدى بنتفرج على الصور القديمه واحنا مع بعض ونضحك علشان هما دلوقتى اصبحو شباب وانسات زى الفل

المهم الثلاث بنات الاخوات والدهم بواب عماره قديمه صغيره مش كبيره والثلاثه معاقين واحده منهم على كرسى متحرك
كانت حياتهم عباره عن انهم جالسين امام باب العماره فقط
روحت جبتهم مع الولد الكفيف مع بنتى مع ابن واحده صديقتى وابتديت بيهم النشاط
نحفظ قران كل الايات الصغيره مع التلوين واعلق لهم صور الرسومات على الحائط وعليها اساميهم مع التاريخ كانو بيفرحو ومع التكرار لاحظت ان فى تحسن فى الاداء الالوان مش بتخرج بره الرسمه وكانو كمان بيرسمو مع نفسهم.

النشاط

كنا بنعمل دايره ونغنى الاغانى بتاعتنا واحنا اطفال صغيرين زى
دخل رجلك جوه طلع رجلك بره نط ثلاث نطاط
ومالك ياسوسن زعلانه ليه
ونضحك من قلبنا انا كدا علمتهم يعنى ايه بره وجوه وظبط اللغه بالاغانى يعنى تنميه مهارات بطريقه ظريفه
كنت ببتكر وافكر فى البيت واروح اشتغل معاهم
اقص قماش وارسم عليه خط واجيب الابره والخيط ونتعلم الخياطة.

اجيب زراير واعرفهم بتركب ازاى واسيبهم يركبو
كنا بنقعد نتكلم مع بعض انا وهما ازاى بتكون النظافه الشخصيه واول مابنصحى من النوم المفروض بنعمل ايه وازاى نعتمد على نفسنا مش على ماما واطلب منهم المره الجايه اشوف مين سمع الكلام
طبعت ورق وعلقته فى المنطقه كلها وعلى باب النادى ان هنا فى نشاط مجانى لذوى الهمم.

تكوين الفريق 

وسبحان الله العدد كان عمال يزيد بسرعه رهيبه مش عارفه لان الناس كانت ظروفها صعبه ومش حمل الجلسات اللى بفلوس ولا احنا فعلا كنا عاملين شغل حلو مع الاولاد وسمع للناس
انا كنت كل يوم ببتكر فى الانشطه مع الاولاد واصنع فى بيتى ادوات اشتغل بيها معاهم واشترى الادوات واعمل لهم مكافات ورحلات حفلات
حبيت اكون تحت كيان واكون قانونا صح انضميت لجمعيه كانت قائمه بالفعل ودخلت مجلس الاداره وبقيت الامين العام.

مطبخ تعليمى 

وجود جمعيه ساعدنى كتير اطور من نشاطنا
عملت مطبخ تعليمى علشان الاولاد تعتمد على نفسها واتعلمنا حاجات صعبه لف الكرنب وعمل المحشى بكل انواعه والبتزا والفراخ الكنتاكى وتخريط الملوخيه وصينيه البطاطس كامله واكلات كتير وكنت بصور الاولاد بث مباشر وهما شغالين بنفسهم.

 

كنت بعمل لهم ورش تعليميه علشان يتعلمو حرفه
زى النول والكروشيه وشغل الخرز كله والاركيت وشغل فوانيس رمضان وبياع الكنافه والفول
بس للاسف كل هذه الانشطه متوقفه علشان الفلوس مش متوفره اجيب خامات الورش او المطبخ لان مازلنا شغالين مجانا
انا لا اتقاضى اجر
احنا كامهات وانا معاهم كنا بنلم مع بعض العشرين جنبه وبنجيب بيها الخامات
عاملين حاجه اسمها صندوق الفريق ٣ امهات هما اللى ماسكينه وبنصرف منه على كل احتياجاتنا
انا دورى اسألهم معانا فلوس نجيب كذا يقولولى اه مستورين او مفيش
ماليش علاقه ومش فاضيه لموضوع الصندوق علشان كدا هو فى حوزه الامهات.

الخلاصه من الموضوع دا ان احنا معندناش متبرع احنا كامهات معتمدين على نفسنا ولو فى مره جالى حد عاوز يساعد حالات دورى بيكون اعرفه الحاله المستحقه مين والايتام مين واللى عندهم ظروف مين وبكون كلى اصرار انه منه للحالات بجمع الحالات وهو منه ليهم واى حد تعامل معايا يشهد بذلك او اصور فيديو للحاله وهى بتستلم وابعتها له مش للنشر بتكون للمصداقية

العلاج بالفن 

المهم حاليا متجهين للعلاج بالفن

جايب نتيجه هايله جدا مع اولادنا اعطاهم ثقه بالنفس كبيره ان الناس بتحيهم وفرحانين بيهم يعنى من الاخر لاقيت حد بيعجب بحاجه انا بعملها فيزيدوا اتقان وتجويد.

علاج الفن من انجح الاشياء اللى جربتها معاهم عندى
فنانين تنوره ومولويه عدد ٧ ماشاء الله

عندى فريق كورال بنحفظ تواشيح وغناء تحفه
عندى فرقه فنون شعبيه كامله
صعيدى ونوبى وبحرى فلاحى ووطنى واجنبى كمان
بشجع المواهب الغنائيه وبدربهم وعندنا اتنين فنانين غناء تحفه
منار والبرنس

الأمنيات
والحمد لله راضيه كل الرضا واتمنا ان ربنا يتقبل عملى ويرضى عنى ويراضينى واولادى دول يفتكرونى على باب الجنه وهما داخلين وميرضوش يدخلو من غيرى زى ما احنا متعودين مع بعض على طول وكلمه ماما اللى بتطلع ليا من قلبهم عندى بالدنيا ومافيها .هما فعلا ولادى واعز واغلى الحبايب ربنا يحفظهم ويباركلى فيهم

ربنا توج عملنا وصول ابني المطرب  احمد البرنس يغني في مؤتمر الرياض وشكر خاص للإعلامية ريهام سعيد واحب اشكر ترك آل الشيخ علي جبر خاطر احمد البرنس وتلبية طلبة واعطاءه الفرصة يغني ويحقق له حلمه وأطالب الإعلام بالاهتمام بكل اولادنا من زي الهمم وأشكر  سيادة الرئيس عبد الفتاح السيسى لأهتمامة الاول بذى الهمم والاحتفال معهم وتشغليهم وتقاليدهم مناصب واندماجهم في المجتمع واقوله كثيرون  مثل فريق قادرون بأختلاف أتمني أن كل عام بالاحتفال يكون فريق مختلف للأحتفال مع سيادة الرئيس عبد الفتاح السيسى