محمد عبدالرحمن
٨ يناير ٢٠٢٦
شركات السياحة والمرشدين السياحين تتسائل عن الاف الدولارات والاف اليورو والاف الجنيهات والاموال بمختلف العمولات !
من الذي يقوم بجمعها ومن الذي يقوم بتوزعها بمنطقة اثار الجيزة !
وما هي الإجراءات القانونية التي يتبعها الدكتور أشرف محي الدين في هذا الأمر!!
وما الإجراءات القانونية التي اتبعها الأمين العام للمجلس الأعلى للآثار محمدإسماعيل في منع هذه الجريمة !!
وهل وزارة الأوقاف أو وزارة التضامن الاجتماعي تباشر الإشراف علي صندوق النذر !!!
دجل وشعوزة داخل معبد الوادي للملك خع اف رع وتحت إشراف المجلس الأعلى للآثار وكله بياكل من التورتة !!
ناس كتير بتقف عند حفرة جوة معبد الوادي بتاع الملك خع ف رع ، تقولك: « ارمي فلوس واتمنى… هيبقى حظك زي أوجست مارييت »
معبد الوادي للملك خع ف رع لا هو مزار طاقة ولا ماكينة أمنيات، ده معبد غالباً كانت بتتم فيه طقوس انتقال رمزي للملك من الدنيا للآخرة.
ومافيش نقش واحد جواه بيقول : «اللي يرمي قرش هنا، ربنا يفتحها في وشه» مافيش الكلام ده
أوجست مارييت اكتشف كم آثار رهيب ماحدش يتخيله في سنة واحدة، ودي كانت من أغنى فترات اكتشافاته فعلاً
بس لازم نعرف أنه مكانش ماشي عشوائي… ده كان دارس، مخطط، وعارف كويس هو بيعمل إيه ؟ ومركز في مناطق لسه ماحصلش فيها تنقيب عن الآثار… يعني كان ماشي بمبدأ علم + شغل + تنظيم… مش حفرة ولا قرش ولا نية صافية .
ومش علشان مارييت اكتشف آثار كتير في سنة واحدة ومن ضمنها تماثيل في المكان ده، يبقى المكان بيطلَّع حظ… اللي مقتنع بكدة عامل بالظبط زي واحد بيقول: «طالما أنا نجحت وأنا لابس الجزمة دي… يبقى الجزمة دي مباركة»
طب ما نشتريها بقى لكل الطلبة ونقفل المدارس بقى ؟
المصري القديم نفسه ماكنش بيؤمن بالحظ العشوائي، ولكن كان مؤمن إن ماعت (النظام والعدل والنظام) هي نتيجة أنك تعمل الصح، تكون منظم وتخطط كويس لكل شيء مش «ترمي وتغمّض عينيك»
الخرافة دي عايشة لحد دلوقتي لأنها سهلة
لطيفة ومريحة لأعصاب الناس اللي فاكرين دايماً إن الدنيا هتظبط من غير مجهود ولا سعي
النجاح بتوفيق ربنا سبحانه وتعالى أولاً ثم السعي والاستمرار فيه مش بالحظ
لو عايز حظ حلو بجد ؟ قرب من ربنا، اقرأ، افهم، اشتغل، واحترم العلم… صدقني دي الطريقة الوحيدة اللي فعلاً بتجيب نتيجة… من أيام المصري القديم لحد دلوقتي .
